Jeff Lam:台灣銀行開戶須知

話說上集講過申領台灣統一證號的方法，有了它，我們便可以用此去申請居留證、駕照、報稅或開立銀行戶口等！但點解要開戶？一來過台灣生活必備，買樓、投資、匯款少不了，再唔係開雅虎奇摩拍賣都用得著。有了證號，也不一定開到戶口，因為每間銀行有唔同政策，職員處理手法又唔同，又會問長問短的，被say no話咁易！

現在我們就介紹大家開戶全攻略吧！首先記得在機場或電話公司出張sim card以便有個台灣聯絡電話，之後想想你自己有冇台灣地址，有就最好，冇就睇吓個別銀行接唔接受你用酒店或朋友地址。另外，開戶最好去你地址附近的分行或直接去總行，否則一半機會被職買叫你翻去就近分行申請過。

開戶要帶備剛到手的統一證號、你的護照和入台簽證（不用像香港般要住址證明的）便可。部分銀行會要求最低存入一千元台幣，應該對大家冇難度。也不像香港，大部分銀都冇收ATM Card等銀行雜費，存款利率也不錯，信用卡利率十幾%，全部好過香港多多聲！除咗台幣普通戶口，記得一定要開埋外幣戶口，否則第日匯唔到港紙/美金過去（香港銀行換台幣食水好深，可免則免）！

再提提大家，自從防止洗黑錢法的相關法規實施後，台灣銀行對海外人士開戶口有嚴格規定， 2019年開始已經比以往嚴謹很多。大家最好在台灣有一定的「聯繫」，譬如有開設生意、打算或正在購買物業、有親戚居住等等，這樣較容易被銀行接受。

萬事俱備，最後順便開埋網上銀行服務同加入幾個常用銀行戶口，咁以後人在香港查數匯款都冇難度！好似Jeff 就一口氣喺三間銀行開咗六個戶口咁癲（圖示）！

下集講講買樓置業吧，大家記得要留意喔，祝大家在台灣生活愉快！

台遊達人專頁/台灣生活群組版主

Jeff Lam