魏力：通告中尋找「變心」端倪

市況淡薄，不如上學，魏力投資進階課程日前開課，由於只收舊生，故未有公開招募；想參加初階課程的朋友，請繼續留意本欄及小弟fb專頁，有詳情將盡快向各位公佈。

魏力（JasonWong）

擅長以趨勢投資法，發掘爆升潛力股。專欄文章見於《蘋果日報》、《雅虎財經》和《now財經》網站，同時為多個人氣網上財經節目的嘉賓主持，深受觀眾歡迎。為香港證監會持牌人。

進階課程主要教睇通告、拆業績，上課時，魏力劈頭問道：哪位同學目前有登入港交所《披露易》睇通告的習慣？眾人你眼望我眼，無反應。魏力再將「習慣」的定義擴闊，只要「定期」、「間中」有睇的都算，才有幾位點頭示意。由此可見，又長又譖的通告確非一般投資者杯茶，但也正因如此，才顯得睇通告對炒股的重要性。

港人日忙夜忙，樣樣都趕，炒股都係一樣，最緊要快。而將「唯快不破」發揮到極緻的，當然是「齋聽冧把」的散戶：「阿George（經紀），我個friend叫我買9394喎！」「咩嚟㗎？」「唔知呀，是但啦！幫我入2球！」由收風到買入，唔使兩分鐘；由「素未謀面」到成為「命運共同體」，比淥個麵還要快。當然，最後結果也可以來得很快……

至於操作前會停一停、諗一諗的朋友，就是最普遍的「圖表戰士」。肯睇圖當然係好，特別係習慣炒即日、甚至只揸幾分鐘博兩格「茶錢」的炒家，圖表幾乎是唯一的操作依據。而前題，當然是幅圖要睇得啱。

「既然睇圖就得，咁睇通告來做乜？」炒短線首先要夠貼市，但不少人真是太忙，一日五個會、寫三份report，點炒呢？但銀紙放銀行無利息，擺磚頭又太犯本，於是就衍生中長線投資股票的需求。當你打算買隻股票坐一年，你點知佢期間會否忽然「變心」？靠的就是通告。

的確，業績是滯後指標，股價總是走在前面，但識睇業績的話，最起碼你會知道是否值得等「負心漢」浪子回頭，抑或要「好心分手」？這也會從圖表以外，提供多一個角度，讓投資者做一個較合理的決定。

「通告又長又譖，好難明喎！」睇通告固然需要一定的中／英文水平，但以睿富讀者的質素而言，相信只要肯踏出第一步，從自己持有的股份開始，持之以恒去閱讀，有問題上網基本都能查到，花幾個月時間克服「通告很難」這個心魔，炒股分析功力自當大有進步！

借用小弟新書結語的一句作結：你不需要很強才能開始，但你需要開始了才會變得很強！