Home / 股票投資 / 魏力:穿越牛熊的投資成功關鍵

魏力:穿越牛熊的投資成功關鍵

新一年先祝睿富讀者投資順境,身心健康,家庭和睦。

俗語有云:好的開始是成功的一半。而一個爛透的港股開局,又是否崩盤的序幕?過去廿年的數據話你知,兩者的關係就猶如賭大細,一半一半。即使1月份出現跌市,全年升跌的比例仍是各佔一半,可見即使「開壞咗個頭」,全年是否就無好結局?並不盡言。

魏力(JasonWong)

擅長以趨勢投資法,發掘爆升潛力股。專欄文章見於《蘋果日報》、《雅虎財經》和《now財經》網站,同時為多個人氣網上財經節目的嘉賓主持,深受觀眾歡迎。為香港證監會持牌人。

當下風頭火勢,盡量減少交易(犯錯),無可厚非。問十個專家(魏力絕非專家,故不在其中),九個都叫你揸cash觀望,剩返一個就話「吼位」買公用股收息。值得一提,「吼位」一詞其實相當過癮,聽落好pro,實際無講過嘢(即係叫你等吓先,但唔知等到乜位),但在電視、網台的問答環節,已可從容將散戶打發過去。

至於揸cash,在絕大多數市況下、對大多數散戶而言,都是對的,皆因連基本股票操作概念都無的散戶(包括但不限於:升唔識走、跌就係咁溝、打死唔止蝕…),無論升跌市(甚至大牛市),都係會輸錢的,所以不賭的確是贏錢。

之不過,inbox入來小弟fanspage問股的散戶,你叫佢揸cash唔買貨的話,大多數是唔收貨的。「目前市況差,xxx走勢亦向下,現價唔應該買,揸cash等機會吧!」之後通常就被追問:「咁yyy同zzz呢?買邊隻好?」為何會出現這個情況呢?魏力想了又想,近日終於有答案。原來一般散戶買個股時,其實只理會價位,而不理會市況、氣氛(更遑論基本因素),「吉利(175)由29蚊跌到15蚊,平咗一半,點都會升番啩!」咁就衝入去,之後結果係點,不用多說。

唔買貨唔安樂,固然有問題,但清倉完全不理市況,連手機報價app都delete埋,又是否應對熊市的好方法?清貨之後,跌市避開了,但對市況不聞不問,久而久之,市感就會消失,到個市真見底,你又會唔會feel到?「咁沽哂貨都照樣睇市,但又唔買貨,得喇啩?」如果做得到,呢位必定係真高手,定力超凡,註定大贏特贏,很可惜,萬中無一。

又想避開熊掌,又想食盡牛市升浪,有何方法?答案就是無論牛熊,都保持適量的投資,只是熊市細細注,主要保持手感、市感,贏輸有限數,到牛市重臨,才可快人一步大注出擊。注碼、而非冧把,才是投資勝負的關鍵。

本人為證監會持牌人,未持有上述提及股份的財務權益。

Share Button