WealtHub 睿富 WealtHub 睿富 理財投資智慧平台
「阿Sir，個市反彈喎，係咪見底呀？買咩博反彈好呀？」每逢個市升超過兩日，這類問題就有如缺堤之水，湧入小弟的fb inbox。見住殘破不堪的愛股有些少生命跡象，總想衝埋去為佢做心外壓，仲要大叫「加油！頂住呀！」如身處大牛市之中，炒股有激情固然是好事；但處身於熊市反彈之中，要全身而退、或減低傷亡數字，更需要的是理性，多諗幾步，而非一味衝衝衝，掃咗再算。
在決定博反彈前，你應該先問自己三件事：
一、你的持倉水平如何？
成手蟹貨？滿手淡倉？抑或吉倉等運到？先講一手蟹點算好，坦白講，如果2月大跌以來，你一路無沽貨，選擇佛系應戰，你應該立即停止這種「自殺式行為」，積極趁彈減貨，而非溝多兩手。多數人以為，溝一溝降低個成本價，會較易返家鄉，但請相信我，到頭來你只會輸更多。何解？請參考小弟新書《4年贏300倍的秘密》。
假如你成手淡倉，證明你大方向睇啱，但短期挾倉難免，要捱一陣。這時你可以博少少正股反彈，抵銷淡倉的損失，感覺良好一點。至於點揀？請睇埋落去。
目前吉倉的話，非常好，證明風險意識幾高，有條件用一小部份的資金去博。持倉水平應該幾多？不用急，一陣會講。
二、你會用幾多錢去博？
衝爆個倉？半倉？抑或20%？魏力會揀（最多）20%。「咁平唔買多啲？升番上去高位好和味喎！」幻想與現實，距離總是十萬八千里。一大堆股票從年初高位洗倉狂瀉四、五成，財富大幅蒸發，人心虛怯，加上資金外流、加息週期、經濟戰困擾，你認為三幾個月可以重上高位？用本金20%去博，已經好盡，如果全倉見紅10%，就清倉離場，這樣對閣下整體倉位表現只是2%，可以接受，也是較理性的博法。
三、揀邊類股博反彈？
瞌埋眼買指數？越殘越博？抑或博仍在高位的股份「強者越強」？先講第一種，只適合全天候盯實個市的炒家，輪證、期指、期權，任君選擇。萬一你有份工，只能在洗手間check股價，揀正股會好一些。今次適逢業績期，出擊對象可以是股價6月份才開始下瀉、而業績仍不俗的股份。為何是6月份？這代表股價在跌市頭幾個月仍守得住，屬於大戶死守的一批「好股」，加上業績不錯，估值又跌至較吸引水平，較大機會成為挾淡倉、基金補貨的對象，值博率較高。
咁即係邊個板塊？方向已提供，自己做做功課，從圖表、業績發掘吧，力不到不為財呢！
魏力著作《4年贏300倍的秘密》在各大書店有售，網上訂購
https://goo.gl/nyQHg7
Goolge Play電子書及試閱版同步上架
https://goo.gl/26iMXZ
