魏力：一切從「撈底」說起

萬分感謝編輯大大的邀請，讓魏力可在此與廣大的天窗、睿富讀者交流，並分享一些炒股的經歷。

魏力（JasonWong）

擅長以趨勢投資法，發掘爆升潛力股。專欄文章見於《蘋果日報》、《雅虎財經》和《now財經》網站，同時為多個人氣網上財經節目的嘉賓主持，深受觀眾歡迎。為香港證監會持牌人。

先問各位一個問題：你買股票有無試過坐艇？「廢話！我陽澄湖長大㗎！蟹，全部都係蟹呀！」Okok，稍安無躁，容許我多問一句：點解你買股票會坐艇？「高追囉！唔買就日日升，到我一買完就跌，黑過乜咁！」

請各位認真諗一下，買股票中伏，真係純粹因為高追？以魏力自己及過去幾年與粉絲交流的經驗，實情剛好相反：輸錢皆因「低追」起。

「阿Sir，呢樣唔係叫『撈底』或者『趁低吸納』咩？做乜自創個新term？」

等我解釋一下。撈，作為動詞，即「打撈」、「撈起」，例如飛機失事，救援人員運用機器在水底「打撈」殘骸；又或食飯時用湯勺「撈湯渣」。講得低撈，即是你覺得你撈的價位就係底部，撈完就會反彈。

重點來了：你點知你撈個價位就係底？

「個價由高位跌咗好多呀！！！」

Ok，請define點為之「跌咗好多」──2成？3成？定7成？

不止一次，當魏力問到呢度，粉絲就開始dead air，繼而消失。的確，跌幾多先係底，誰說得準？所以，小弟拙作《4年贏300倍的秘密》中，「炒股十戒」的第一戒，就是「別買處於跌勢的股票」。「跌勢」者，一浪低於一浪也。

舉個例：近幾年「升到你唔信」的騰訊（700），今年1月及3月，股價出現「雙頂」（分別為476.6及475.6元），之後大股東Naspers以405元配股減持，股價8月2日跌至340.4元，高位跌了28.6%。見底未？跌夠未？你問我，我問誰？我只知道，目前騰訊是一浪低於一浪，唔買得，（昔日）「股王」都係咁話。

買股票最易輸身家的情況，就係自以為「低撈」，點知原來係「低追」，越追越低，仲要太早就入場開始追，溝下一注，溝下又一注，瞓身盡買之後，發現股價還在山腰……

股價是反映投資者對公司未來業績的睇法，而散戶卻往往誤用以往的資訊（例如：盈利高增長、wechat人人都用、手遊潛力無限等）作為買賣參考，這猶如望實倒後鏡來揸車，點會唔炒車？

筆者為證監會持牌人，未持有上述股份權益。

魏力著作《4年贏300倍的秘密》在各大書店有售，網上訂購
https://goo.gl/nyQHg7

Goolge Play電子書及試閱版同步上架
https://goo.gl/26iMXZ