魏力：「殺人」的炒股正能量

（魏力：本文屬家長指引類別，內容可能會衝擊各位一直以來的「核心價值」，敬請留意。）從細到大，無論父母、老師、流行曲，以至廣告，都在重複又重複教我們一件事：做人要樂觀，要正能量。「打波先嚟落雨」唔緊要，因為第二日都會好天；事業失敗唔緊要，因為「辦法總比困難多」；失戀亦唔緊要，因為「生命滿希望」，真愛在轉角呢！咁炒股坐艇呢？又係咪「懷着樂觀總有轉機」？

魏力（JasonWong）

擅長以趨勢投資法，發掘爆升潛力股。專欄文章見於《蘋果日報》、《雅虎財經》和《now財經》網站，同時為多個人氣網上財經節目的嘉賓主持，深受觀眾歡迎。為香港證監會持牌人。

阿Sir，乜你未聽過「機會是跌出來」咩？股神都教我地，別人恐慌時要貪婪呀！以上兩個炒股思維，魏力是絕對同意的，但問題是「幾時用」和「點樣用」？正如識用砒霜可以治病，亂用就是毒藥了。

事實上，全球投資者中，絕大部份都是樂觀、靠升市賺錢的（long-biased），遇上熊市就麻煩了，股市十日跌七日，以為股價夠殘，撈底博反彈？轉眼就一褲都係蟹。以為「股王」可以穿越牛熊，有買貴無買錯？十年後去睇，可能係，但人生又有幾多個十年？更重要的問題是：你能夠捱過這十年嗎？

面對金錢，人性是脆弱的–即使是最樂觀的人。

今年3月，騰訊（700） 由475跌到400蚊，高位跌15%，當時魏力親眼目睹散戶在400蚊用樂觀的心，築起一道又一道的「血肉長城」，死守港股的核心價值（當時恒指常被稱為「騰指」）。上個月，騰訊跌到落300蚊，但「死士」已不復見，300蚊大關話穿就穿。你可能會疑惑：為何400蚊咁多人肯撈，落到300蚊反而唔敢出手呢？平咗25%喎！很大機會，樂觀的人已開始在質疑自己了。

炒股最「蝦人」的地方，是樣樣事情都講timing，樂觀又好、悲觀也好，啱方向但錯timing，一樣會被市場欺凌。開頭捱兩拳仲頂得住，但對家之後拎把刀出嚟同你放血，血肉之軀，請問你捱得幾多刀？賬面輸錢已經夠痛，更傷的是，你開始質疑、唔再相信自己，信心逐日磨蝕，直至消失殆盡。再過一段時間，恐懼會完全佔據你的思維，輸了7成、8成後，你只想盡快獲得解脫，拎起電話，不問價「斬立決」！從前拍心口話「有買貴無買錯」，依家就驚到「有斬錯無放過」，而不幸的是，通常這時就是股價的底部……

魏力要再次強調，樂觀對炒股非常重要，但無限膨脹的正能量，卻是炒股的大忌，特別是連贏幾鋪、覺得自己手風大順之時，很容易會忽視了風險。要防止引火自焚、樂極生悲，適當的悲觀／負能量是必須的，而在股票執行上，就是嚴守止蝕。

誰說正能量不會殺人？