曾智華：香港股市「爛生果」太多

股市大部分時間皆滯吓滯吓， 每日交投平均幾百億，以一個二千二百幾間上市公司的證券市場計，交投量實在太奀豬。點解？為此，我約過曾被國際財經雜誌評為最佳分析員的「精明L」共進晚餐，希望聽聽佢高見。

曾智華

資深傳媒人、香港最受歡迎電台節目主持及監製（1987至2014）、前香港電台節目發展總監。2014年退休、重獲自由，立即開始人生精彩下半場。

「L哥，點解香港股市愈玩愈縮？」

「原因複雜，但有一個，似乎無乜人提過。就是，香港股市，『爛生果』太多，嚇怕投資者！香港上市公司數量，自從李小加揸FIT後，增長速度驚人，2017-2019年，已增加近二百間！如此只講量不講質，當然『豬狗公司』也變上市公司，當中良莠不齊，大部分上市即潛水，投資者紛紛中招，損手爛腳！」

事實，香港上市活動非常頻繁，極為誇張，超英趕美，單單2018上半年，已有近百公司上市，全球排名第一，集資五百多億。而正在搞IPO的公司，長期也有幾十間。

「可能，李小加誤會咗，以為上市公司數量多寡，與佢業績及表現有等號。其實，搞錯晒囉。」L哥目光如炬，先歎啖十七年日本「響」威士忌，再分析：「打個比如，你附近有

兩個生果市場，一個有幾百檔，但當中百幾檔賣腐爛或低質素生果，全部用農藥化肥催谷種植。另一個，只有一百檔，但檔檔售賣高質素有保證的新鮮水果，包括名牌入口貨，消費者大可放心購買。咁，你會行邊個市場呢？」

目前的香港股市，正是「精明L」指出的第一個市場，當中充滿「爛生果檔」（創業版及大量不明業務的公司）， 這絕對是不智亦對投資意欲有負面影響。

所以， 除將來上市申請應嚴加檢視外，現存的「爛生果檔」，亦要想辦法掃走，做到只重質，不重量。唯有如此，全球投資者才會慕名蜂湧而來搶購，結果是，生意一定遠勝檔口多而質素低的市場。

「還有，目前香港的股票供應，遠大於需求，不少劣質公司每日成交甚低甚至零成交。這些『檔口』，根本浪費空間，港交所必定要諗諗如何汰弱留強，才有機會成為真正全球頂級金融中心。靠鬥多『爛生果檔』，無用的！」

=========================
曾智華《有盈退休》
天窗網店購買>>http://bit.ly/2VL4fAf
Google電子書>>http://bit.ly/30IYRBJ