曾智華：談年金 – 瞓身買年金

早前，有一關於年金計劃的分析，在WhatsApp群組間轟炸式傳開，結論是：買唔過，因為乃是一個「蝦老人家」的計劃。各人有各人的盤算，無絕對啱或錯。所以，凡人問我的意見，一律唔答，只好留在此「自言自語」。

坦白，年金初推出我好無癮，因當時還有幾個月才夠六十五歲，無法飲得頭啖湯。對年金，小弟的看法是，上限太少，最好去到起碼二千萬！這樣，小弟就可將擁有的單位作逆按揭，去盡，買二千萬年金。如此，每月就有$116,000生活費直至百年歸老，諗諗已開心死，不單又充實又安全，兼且，咁多錢，一定使唔晒，除可不停請朋友歡聚外，更可每月留下五六萬元再作投資考眼光。

香港地，投資工具極多，但唯一能製造出富翁的，只有死揸物業一個途徑。並非當事人特別醒特別叻，只因受惠高地價政策矣。

至於其他投資方式，包括外幣、股票、期貨、炒金炒銀、虛擬貨幣、衍生產品、保險年金、各式基金、Accumulator ⋯⋯，唔好自己呃自己嘞！有幾多樣可以替你長期先保本後年年跑贏通脹呢？嗱，話明長期呀！

更甚，希望透過以上投資方式發達？一千個之中有無一個呢？無謂發白日夢嘞，尤其打工仔，唔該踏踏實實以勞力腦力換取應得報酬啦。若能（如今不能，因限注太細），我必會瞓落年金，因為：

（一）從來政府放出來的，無論是上市公司（地鐵、領展、港交所）或iBond、銀色債券，皆派錢之作。後者揸咗睡得安心，前者，若由上市開始長揸唔放，至今已有起碼廿倍回報（小弟親身體驗，無人可以話唔係！）。政府推年金，正是為「唔識投資者」（有幾多個識吖！）提供安全穩定收益，以免「棺材本」手多多無咗。

（二）退休人士，最重要內心安寧。若不需要左度右度已每月有肯定收入，對心理平衡有幫助。

（三）大家可問任何醫學界人士，個個都話你知，人愈來愈難死。為免晚年生活坎坷，若我能先盡買年金而一世每月有十萬生活費，咁就瞓着都笑醒啦！

=========================
曾智華《有盈退休》
天窗網店購買>>http://bit.ly/2VL4fAf
Google電子書>>http://bit.ly/30IYRBJ